الجواب: اسے بیع سلم کہتے ہیں ، یہ بارہ شرطوں سے جائز ہوتی ہے اگر ان میں سے ایک بھی کم ہوگی تو بالکل ناجائز اور سود ہوجائے گی:
(۱) اس شیئ کی جنس بیان کردی جائے مثلا گیہوں یا چاول یا گھی یاتیل، اگر ایک عام بات کہی مثلا غلہ میں لیں گے تو ناجائز ہے۔
(۲) وہ جنس اگر کئی قسم کی ہوتی ہے تو اس کی قسم معین کردی جائے جیسے چاول میں باسمتی ہنس راج، اگر نرے چاول کہے بیع صحیح نہ ہوگی۔
(۳) اس کی صفت بیان کردی جائے مثلا عمدہ یاناقص جیسے چنوں میں فردیا کسیلے
(۴)اس کی مقدار معین کردی جائے مثلا اتنے من،اوریہ بات بھاؤ کاٹ دینے سے بھی حاصل ہوجاتی ہے یعنی فی روپیہ اتنے سیر کہ روپوں کی گنتی معلوم ہونے سے کل مقدار خود معلوم ہوجائیگی۔
اور جہاں مختلف پسیروں کا رواج ہو وہاں پسیری کی تعیین بھی ضروری ہے کہ فلاں پسیری سے اتنے من اور جہاں کچا پکا دونوں من بولا جائے وہاں اس کی تعین بھی لازم ہے غر ض کوئی بات وہ نہ رہے جس میں آئندہ جھگڑا اٹھنے کی صورت ہو۔
(۵) میعاد معین کردی جائے جو یاک مہینہ سے کم نہ ہو اگر تعیین نہ کی مثلا جب چاہیں گے لے لیں گے یا سفر کو جاتاہوں جب پلٹ کر آؤں گا لے لوں گا تو ناجائز ہوگا۔
(۶)اگر وہ چیز باربرداری کی ہے جس کے یہاں سے وہاں لے جانے میں خرچ ہوگا تو وہ جگہ بھی معین کی جائے جہاں پہنچنا منظورہے مثلا فلاں شہر یا فلاں گاؤں میں پہنچتے ہوئے، اس میں بیچنے واسے کو اختیار ہے گاکہ اس گاؤں یا شہر کے جس مقام ومحلہ می ں چاہے پہنچادے وار جو مکان بھی خاص کردیا تو وہی پہنچنا پڑے گا۔
(۷)ثمن کی بھی تعین ہوجائے مثلا روپے یااشرفی
(۸)اگر وہ ثمن چند قسم کا ہوتا ہے تو قسم بھی معین کردے مثلا اشرفی محمد شاہی یا انگریزی۔
(۹) کھرے کھوٹئے کا بیان بھی ہو جیسے لکھنؤ کا روپیہ یاانگریزی چہرہ دار یا جے پور کی چاندی یا اینٹ کا سونا۔
(۱۰) اگر ثمن اس قسم کا ہے کہ اس کے ہر ٹکڑے کے مقابل شے مبیع کاٹکڑا ہوتہے جیسے سونا، چاندی، روپیہ اشرفی کہ گیہوں روپیہ کے من بھر ہوئے تواٹھنی کے بیس سیر، چونی کے دس سیر ہوں گے تو ایسی ثمن کی تعیین مقدار بھی ضرورہے مثلا اتنے تولہ چاندی یا اس قدر روپے اور اگر وہاں مختلف وزن کے سکے چلتے ہوں جیسے حیدرآباد میں نوابی وانگریزی روپیہ وہاں سکہ کی تعیین بھی چاہئے
یہ دسوں باتیں خاص عقد ایجاب وقبول میں بیان کرنی ضروری ہےں ، مثال اس کی یہ ہے کہ زید وعمر سے کہے میں نے تجھ سے بریلی کی تول سے دس من پختہ چاول ہنسراج کھرے بالعوض سوروپے انگریزی چہرہ دار کے آج سے چارمہینے کے وعدہ پر بریلی پہنچتے ہوئے خرید ے، وہ کہے میں نے بیچے یا میں نے تجھ سے بدایوں کے وزن سے چارمن پکا گھی بھینس کا خالص آج سے دومہینے کے دعدہ پر مرادآباد پہنچتاہوا بالعوض چھ اشرفی محمد شاہی بیس بیس روپے والی کے خریدا، وہ کہے میں نے بیچا، یہ سب باتیں خوب خٰال کرلی جائیں کہ لوگوں میں آج کل بیع سلم کا بہت رواج ہے، ان زبانی شرطوں کے ترک سے حلال کوناحق اپنے لئے حرام کرلیتے اور خدا کے گناہ میں گرفتارہوتے ہیں
(۱۱)شرط یہ کہ اسی جلسہ میں ثمن ادا کردیا جائے ورنہ اگر یہ ساری گفتگو کرکے ثمن دیئے بغیر متفرق ہوگئے تو بنابنایا عقد فاسد وناجائز ہوجائے گا یہاں تک کہ اگر وہاں سے آٹھ کر گھر میں روپے لینے گیا اور
بیچنے والے کی نگاہ سے آڑ ہوگئی عقد فاسد ہوگیا۔
(۱۲)وہ چیز اس قسم کی ہو کہ روز عقد سے ختم میعاد تک ہر وقت بازار میں مل سکے ورنہ عقد ناجائز ہوگا اسی لئے اگر گیہوں کی کٹوتی میں یہ لفظ کہہ دیئے کہ نئے گیہوں لیں گے اور اس وقت نیا گیہوں بازار میں نہیں تو ناجائز وگناہ ہے اور اسی سبب سے رس کی کٹوتی جو ایکھوں کے وقت کرتے ہیں حرام ہوئی کہ رس اس وقت بازار میں نہیں ہوتا۔
