Brailvi Books

جواب : جائز ہے کیونکہ معیا ر شرعی نصف صاع ہے نہ کہ اس سے کم، لہٰذا نصف صاع سے کم میں زیادتی جائز ہے، عالمگیری میں آتا ہے کہ مٹھی بھر کی بیع دو مٹھی بھر سے ایک سیب کی بیع دو سیبوں سے جائز ہے او رنصف صاع سے کم ایک مٹھی کے حکم میں ہے۔(ت)

(۱؎ مجموعہ فتاوٰی         باب الربوٰ    مطبع یوسفی لکھنؤ    ۳/ ۹۵)

ثالثاً  رسالہ صفحہ ۱۶۹، ۱۷۰ پر بحرالرائق کا ارشاد دیکھئے کہ ایک پیسہ سو پیسے کو بیچناجائز، یہاں بھی اتحاد جنس قطعی اور زیادت بدیہی، پھر شبہہ ربا کیوں نہ ہوا۔

رابعا  آپ کو اگر کاغذ اور چاندی کا دو جنس ہونا نہ معلوم ہو تو انہیں اہل عرف سے پوچھ دیکھئے جن پر آپ کے خیال کا سارا دار ومدار ہے کہ وہ جس طرح یوں کہتے ہیں کہ یہ اشرفی پندرہ کی ہے یہ بیس کی یہ پیسے اٹھنی کے ہیں یہ چوانی کے، یہ نہیں کہتے کہ یہ اشرفی پندرہ روپے ہے یہ پیسے اٹھنی چوانی ہیں اسی طرح یوں کہتے ہیں کہ یہ نوٹ دس کا ہے یہ سوکا، یہ نہیں کہتے کہ یہ نوٹ دس روپے ہے، خود آپ نے فرمایا ہے کہ ''نوٹ سو روپے کا کوئی ہلاک کردے''، اور فرمایا''سوروپے کا نوٹ جب بیچا جاتا ہے''، اور فرمایا''نوٹ سوروپے کا دیوے'' اتحاد جنس کا نشہ اس سے اتار کر، وہ مسائل یاد کیجئے جوائمہ کرام نے فرمائے کہ :

۱۔ ایک روپیہ ایک اشرفی بلکہ سو اشرفیوں کو بیچنا جائز۔ ص۱۶۳۔

۲۔ ایک پیسہ ایک روپیہ بلکہ ہزار روپیہ کو بیچنا جائز ص۱۷۷،۱۸۳،۱۸۴۔

۳۔ ایک اشرفی ایک پیسہ کو خریدنے میں نہ ربا ہے نہ شبہہ ربا۔ ص۱۸۳و۱۸۴۔

ان میں شبہہ ربا کیوں نہ ہوا۔

خامساً بتصریح ائمہ یہاں شبہہ علت مثل علت اور حکم علت لازم علت، تو یہاں علت ہو یا شبہہ علت، بہر حال لزوم حکم علت اور حکم علت تحریم تفاضل فی القدر ہے تو سو کا نوٹ جو آپ سو کو بیچنا جائز کررہے ہیں صراحۃً سود حلال کررہے ہیں۔

قولہ علاوہ ازیں جو بیع و شرائے نوٹ میں تفاضل اختیار کرے گا مقصود اس کو بجز اس کے کہ بعوض کم روپے کے زیادہ روپے حاصل ہوجائیں اور کچھ نہ ہوگا مگربطورحیلہ کے وہ نوٹ کامعاملہ کرے گا اور پر ظاہر ہے کہ ایسے ارتکاب حیلہ سے حکم حلت کا نہیں ہوسکتا۱؎۔

 (۱؎ مجموعہ فتاوٰی    کتاب البیوع    مطبع یوسفی لکھنؤ    ۱/ ۹۸۔۳۹۷)

اقول: اولاً قصور معاف ع

مستی ازبادہ شبانہ ہنوز

 (جوانی کی مستی ابھی موجود ہے۔ت)