Brailvi Books
 |
فتاویٰ رضویہ جلد نمبر۱۳(کتاب الطلاق ،ایمان، حدود وتعزیر ) |
96 - 175
مسئلہ۱۳۱: از شہر بریلی مدرسہ اہلسنت و جماعت مسئولہ طالبعلم مدرسہ مذکور ۲۳شوال ۱۳۳۸ھ کیافرماتے ہیں علمائے دین اس مسئلہ میں کہ زید نے اپنی علاتی اخت کی نواسی کے ساتھ چھ برس ہوئے نکاح کیا تھا اس سے ایک لڑکی ہوئی، اب زید کو اور محلہ کے لوگوں کو معلوم ہو ا کہ زید کا یہ نکاح صحیح نہیں ہوا زید سے تفریق کرادی، زید کا یہ نکاح صحیح ہو ایانہیں تو اس لڑکی کا مستحق کون ہے، مہر لازم ہو ایانہیں؟عدت ہوگی یانہیں؟اور اس نکاح کے وکیل و گواہ اور پڑھانے والوں کا کیاحکم ؟اور زید پر کیا حکم؟باوجود اس کے کہ بے علم ہیں۔
الجواب نکاحِ مذکور حرام حرام قطعی حرام، اور زیداور نکاح خواں ووکیل و گواہ سب سخت تر گناہ کبیرہ میں گرفتار، اور جہل اس کے گناہ کبیرہ ہونے سے خارج نہ کرے گا بلکہ جہل خود دوسرا گناہ کبیرہ ہے، ولہذا حدیث میں ہے:
ذنب العالم واحد وذنب الجاھل ذنبان۱؎۔
عالم کا گناہ ایک گناہ ہے اور جاہل کا گناہ دوہرا گناہ۔