Brailvi Books
 |
فتاویٰ رضویہ جلد نمبر۱۳(کتاب الطلاق ،ایمان، حدود وتعزیر ) |
161 - 175
مسئلہ۲۴۳:مرسلہ منشی عبدالصبور صاحب سوداگر۶ذی الحجہ ۱۳۲۱ھ کیافرماتے ہیں علمائے دین اس مسئلہ میں کہ ایک شخص نے وقت شروع کرنے روز گار کے، یہ خیال کرلیا کہ مجھ کو جو نفع ہوگا اس میں سولھواں حصہ واسطے اﷲ کے نکالوں گا، اب اس کو لاگت سے زائد ایک روپیہ نفع ہوا لیکن متفرق خرچ یعنی تنخواہ ملازمان وغیرہ میں دو آنے اس نفع ایک روپے میں صرف ہوگئے باقی چودہ آنے رہے، اب وہ اصلی لاگت سے جو نفع ہوا ہے اس میں سے سولھواں حصہ نکالے یا بعد مجراکرنے خرچ متفرق کے ماہوار میں سے نکالے۔
الجواب صرف خیال کرلینے سے وجوب تو نہیں ہوتا جب تک زبان سے نذر نہ کرے، ہاں جو نیت اﷲ عزوجل کے لئے اس کا پورا کرنا ہی چاہیئے، جو خرچ کہ تجارت کے متعلق ہو اور حساب تجارمیں اسی پر ڈالا جاتا ہے وہ مجرادے کر جو بچے اسے نفع کہتے ہیں، پھر اس نفع میں جو کچھ اپنا خرچ خانگی وغیرہ دیگر مصارف علاوہ خرچ تجارت میں صرف ہوجائے وہ مجرانہ دیا جائے گا کہ یوں تو جو نفع بچتا ہے وہ خرچ ہی ہونے کےلئے ہوتا ہے ، پس وہ نوکر اگر تجارت کا نوکر ہے اور اس کی تنخواہ حسبِ دستور تجارخرچ تجارت میں محسوب کی جاتی ہے، اس کے بعد جو بچتا ہے وہ نفع سمجھا جاتا ہے، جب تو چودہ آنے کا سولھواں حصہ تصدق کرے اور اگرخرچ تجارت مجرادے کر کامل روپیہ بچا تھا یہ تنخواہ اس کے متعلق نہیں تو پورے روپیہ کا سولھواں حصہ دے۔واﷲ تعالٰی اعلم۔
مسئلہ۲۴۴تا۲۴۷:مرسلہ محمد عبدالصبور صاحب سوداگرابن منشی محمد ظہور صاحب جوہری ۲۰ربیع الآخرشریف اس مسئلہ میں کیافرماتے ہیں علمائے دین، ایک شخص نے اپنی تجارت کے منافع میں خدا وندکریم کاسولھواں حصہ مقرر کیاہے۔ (۱) اس سولھویں حصہ میں محفل میلاد شریف و نیاز گیارھویں شریف کرنا چاہئے یانہیں؟ (۲) اس سولھویں حصہ میں اپنے والدین و پھوپھی وخالہ و سید صاحب و مولوی صاحب کو دینا چاہئے یانہیں؟ (۳) اس سولھویں حصے میں سامع رمضان المبارک کو دینا و نیز افطاری رمضان المبارک کرنا چاہئے یانہیں؟ (۴) دربارہ زکوٰۃ مذکورہ کے روپے کو طالب علموں کی خورد ونوش و لباس میں صرف کرنا چاہئے یانہیں،اور زکوٰۃ کاروپیہ مؤذن کو دینا چاہئے یانہیں؟
الجواب اگر نہ یہ منت ہے نہ زکوٰۃ ہے بلکہ یونہی دل میں نیت کرلی یا بے الفاظِ نذر زبان سے کہہ لیا ہے کہ اپنے منافع تجارت سے سولھواں حصہ نیک کاموں میں اﷲ تعالٰی کےلئے صرف کیا کروں گا، جب تو اس سے محفل میلاد شریف اورگیارھویں شریف اور افطاری رمضان شریف اور اپنے والدین و سادات و علماء کی خدمت سب کچھ کرسکتا ہے کہ یہ سب نیک کام اﷲ تعالٰی ہی کےلئے ہیں جب کہ نیت خالص اﷲ عزوجل کے واسطے ہو، رمضان مبارک کا سامع اگر حاجتمند ہو اور اس سے اجرت نہ ٹھہری ہواور نہ رواج کی رو سے اجرت مقرر ہو تواسے بھی دے سکتاہے کہ اب اسے بھی دینا نیک کام ہے،اور اگر اجرت کی شرط ہولی یا ازروئے رواج اس کی اجرت کا قرار دیا ہے تو اسے دینا کچھ نیک کام نہیں بلکہ گناہ ہے،