Brailvi Books

کسی سچی بات کے لئے قرآن پاک کی قسم کھانا یا اس کا اٹھالینا گناہ ہے یانہیں؟آپ کو تکلیف دینے کی اس وجہ سے ضرورت ہوئی کہ ایک شخص سے کہا گیا کہ اگر تو سچا ہے تو قرآن شریف کواٹھالے۔ اس کا اس نے جواب دیا کہ میں سچائی پر ہوں لیکن میں قرآن شریف نہیں اٹھا سکتا ہوں کیونکہ قرآن شریف اٹھانا ہر حالت میں گناہ ہے، دوسرا فریق کہتا ہے کہ سچا قرآن شریف اٹھانا گناہ نہیں ہے البتہ جھوٹا قرآن شریف اٹھانا گناہ ہے، مہر بانی فرما کر مطلع فرمائیے کہ دونوں باتوں میں کون سی بات سچی ہے؟

الجواب

جھوٹی بات پر قرآن مجید کی قسم کھانا یا اٹھانا سخت عظیم گناہ کبیرہ  ہے اور سچی بات پر قرآن عظیم کی قسم کھانے میں حرج نہیں اور ضرورت ہوتو اٹھابھی سکتا ہے مگر یہ قسم کو بہت سخت کرتا ہے، بلاضرورتِ خاصہ نہ چاہئے، واﷲ تعالٰی اعلم۔

مسئلہ۲۱۶: از برٹس گائنا براراتیرس وینج ایسٹ بنک مسئولہ عبدالغفور ۲۴صفر المظفر۱۳۳۴ھ

اگر لوگوں نے کلام اﷲ کو ہاتھ میں لے کر حلف کیا اپنے پیش امام کی تابعداری کا،وہ حلف یمین ہوا یا کہ نہیں؟اور یاکہ شرف ہوا اﷲ تعالٰی کے ساتھ؟یاگناہ ہوا؟ اور یا کہ ایسا حلف قسم کلام کا ہوا؟ اور قسم کلام اﷲ کا کھانا درست ہے یاکہ نہیں؟ اور جو حدیث شریف میں آیا ہے کہ غیر اﷲ کی قسم کھانا شرک ہے اور لوگوں نے حلف کیا ساتھ کلام اﷲ کے، تو وہ غیراﷲ کا قسم کہا جائے گا یاکیا کہا جائیگا؟فقط۔

الجواب

کلام اﷲ، اﷲ عزوجل کی صفت قدیمہ ہے۔ صفاتِ الٰہیہ عین ذات ہیں نہ کہ غیر ذات۔ کلام اﷲ کی قسم ضرور حلف شرعی ہے،

لانہ من صفاتہ وقد تعورف الحلف بہ فکان کالحلف بعزتہ وعظمتہ وجلالہ لاکالحلف برحمتہ وجودہ وکرمہ لعدم التعارف وھذاھو منات الحلف الشرعی کما فی الدرالمختار وغیرہ۔

کیونکہ یہ اﷲ تعالٰی کی ایسی صفات میں سے ہے جس کے ساتھ قسم کھانا متعارف ہے لہذا قرآن کے ساتھ حلف ایسا ہی ہے جیسا کہ اﷲتعالٰی کی عزت،عظمت اور جلال کی قسم ہے۔ اور اﷲ تعالٰی کی رحمت، جوداور کرم کی قسم کی طرح نہیں جن سے قسم متعارف نہیں ہے، اور یہی متعارف ہونا نہ ہونا ہی شرعی قسم کا معیار ہے، جیسا کہ درمختار وغیرہ میں ہے۔(ت)

ہاں مصحف شریف ہاتھ میں لے کر یا اس پر ہاتھ رکھ کر کوئی بات کہنی اگر لفظاحلف و قسم کے ساتھ نہ ہو حلف شرعی نہ ہوگامثلاً کہے کہ میں قرآن مجید پر ہاتھ رکھ کر کہتا ہوں کہ ایساکروں گا اور پھر نہ کیا تو کفارہ نہ آئے گا۔واﷲ تعالٰی اعلم۔