Brailvi Books

مسئلہ ۲۵۵: از رامپور محلہ گھیر یُوسف الدین خاں دیوار جنوبی انگوری باغ متصل مسجد پاکھر مطب نمبر ۳۴ مسئولہ سید مختار احمد یتمٰی ڈاکٹر ۱۷جمادی الاولٰی

ایک مرد مسلمان کا پاک عورت مسلمان کے ساتھ عقدِ شرعی ہُوا، لیکن اب منکوحہ سے شوہر مذکورکوئی تعلق ظاہری وباطنی نہیں رکھتا اور ہرطرح منکوحہ سے بے پروا ہے ابتدائے نکاح سے ہنوز کوئی بات تخلیہ شوہریت کا بھی نہیں ہُوا معلوم ہوا کہ شوہر دائرہ مردانیت سے بالکل بعید ہے یعنی نامرد ہے لہذا اس قسم سے یا ایسے نامرد سے منکوحہ نکاح جائز ہے یا ناجائز، اس عورت کو کیا عمل کرنے کی ضرورت ہے، اور موافق حدیث شریف کیا حکم ہے؟

الجواب

نکاح صحیح ہوگیا، عورت بےموت یا طلاق جُدانہیں ہوسکتی اگرچہ مردنامرد ہو۔ ہاں چارہ کارحاکمِ شرعی کے یہاں دعوٰی ہے وہ اس ثبوت لینے کے بعد کہ مرد اس پر قادر نہ ہوا، مرد کو ایک سال کی کامل مہلت دے کہ اپنا علاج کرے، اس سال میں عورت مرد سے جُدا نہ رہے اگر سال گزر جائے، اور اب بھی قادر نہ ہو عورت پھر دعوٰی کرے اور حاکم پھر ثبوت لینے کے بعد عورت پُوچھے کہ تُو اپنے اس شوہر کے پاس رہناچاہتی ہے یا اپنے نفس کو اختیار کرتی ہے،اگر عورت فوراً بلاتاخیر کہہ دے کہ میں نے اپنے نفس کو اختیار کیا، تو حاکم اُن میں تفریق وجُدائی کردے، یہ تفریق طلاق ہوئی، اور اب بعد عدّت عورت دوسرے سے نکاح کرسکے گی ورنہ نہیں، یہ حکم عورت کی جانب ہے، رہامرد، اُسے حکمِ شریعت ہے کہ جب وُہ عورت کا حق ادا نہیں کرسکتا تو اُس پر فرض ہے کہ عورت کو طلاق دے دے نہ دے گا تو گنہگار ومستحقِ عذاب 

ہوگا۔ واﷲتعالٰی اعلم۔

مسئلہ ۲۵۶:مرسلہ مولوی رحیم بخش صاحب مدرس ساکن شیر کوٹ تاجر الموڑہ ۶ربیع الآخر ۱۳۳۸ھ

یہاں کوہِ الموڑہ پر ایک شخص امان اﷲ نے اپنی دختر کا نکاح سیّد فضل حسین شاہ باشندہ ٹھاکردوارہ سے دیا، رخصت ہوگئی، سال بھر تک عورت اپنے شوہر کے پاس رہی اور ہم بستری ہوئی، پھرباپ کے یہاں آئی، امان اﷲ وسیّد فضل حسین میں کوئی رنجش پیدا ہُوئی، فضل حسین اپنی منکوحہ کوٹھاکردوارہ لے جانا چاہا، امان اﷲنے لے جانے نہ دیا بلکہ قسم قسم کے تنازع ہوگئے یہاں تک کہ نوبت نالش کی آئی۔ امان اﷲ نے جُھوٹا طلاق کا دعوٰی کیا کہ بوجہ ظہوِ دروغ حاکم نے خارج کردیا۔

ثانیاً مقدمہ اجازت فعل مختاری قائم کیاوُہ بھی خارج ہُوا، بعد ازاں سیّد فضل حسین اپنے مکان پر تھا، یہاں کے تھانہ دار سے کچھ مخاصمت تھی تھانہ دار نے عناداً سیّد مذکور کو بریلی کے پاگل خانے میں بھیج دیا، اس اثناء میاں امان اﷲ موقع پاکر بربناءِ پاگل ہونے کے مقدمہ دائر کرکے حاکم سے اجازت نکاح ثانی کی چاہی، حاکم ہندو  نے وجہ پاگل ہونے کی قائم کرکے نکاحِ ثانی کی اجازت دے دی، امان اﷲ نے اجازت سے دس۱۰ دن بعد نکاحِ ثانی کردیا جسے اب کئی سال گزرے، جب سیّد فضل حسین رہائی یاب ہُوا تو آکر داد خواہ ہُوا اور مقدمہ دائر کردیا۔ لہذا علمائے دین ومفتیانِ شرع متین سے اس صورت میں استفسار مطلوب ہے کہ نکاحِ ثانی دختر امان اﷲ کا بنائے مجنونیت پر جائزہُوا یا نہیں، اگر ناجائز ہوتو بوجہ مرورِ مدّت چند سال فضل حسین کا دعوٰی ساقط ہُوا یا نہیں؟ بینواتوجروا۔

الجواب

صورتِ مستفسرہ میں ہندہ کا یہ نکاح ثانی کہ اس نے زندگیِ شوہر میں بے وقوع طلاق دوسرے شخص سے کرلیا بالاتفاق محض ناجائز مردود ہے اور حاکم کی اجازت باطل ومطرود۔ ہمارے امام مذہب سیّدنا امام اعظم ابوحنیفہ رضی اﷲتعالٰی عنہ نے جن کے ہم پیروہیں اور اُن کے اعظم اصحاب حضرت امام ابویوسف رحمۃ اﷲتعالٰی علیہ کے مذہب پر تو اس بیہودہ نکاح کے عدمِ جوازاور عورت کا اب تک بدوستور زوجیّت شوہر اوّل میں ہونا آفتابِ نیمروز سے زیادہ روشن کہ ہمارے امام کے مذہب میں جنون شوہر کے باعث عورت کو ہرگز کسی وقت تفریق کرانے کا اختیار حاصل نہیں ہوتا، اور یہی مذہب اعظم ارکان مذہب امام ابویوسف کا ہے اور اسی کو بوجوہِ کثیرہ ترجیح حاصل، اسی کو تمام متونِ مذہب مثل کنز و وافی و وقایہ ونقایہ ومختارواصلاح وتنویروملتقی وغیرہا میں اختیار فرمایا، اسی دلیل کو عامہ شروح معتمدہ مثل ہدایہ وکافی وتبیین واختیار وفتح القدیر وغیرہ میں مرجح کیا، اسی پر اکثر فتاوٰی کا اطباق ہُوا، اسی کو امام اجل قاضی خاں نے اپنے فتاوٰی میں مقدم رکھا اور وُہ اسی قول کو مقدم رکھتے ہیں جو راجح ومعتمد ہو، اسی کو علامہ ابراہیم حلبی نے ملتقی الابحر میں تقدیم دی اور وُہ اسی کو تقدیم دیتے ہیں جو مؤیدہو، اسی کو خانیہ پھر خزانۃ المفتین میں ہمارا مذہب کہا ا مام علامہ فخرالدین زیلعی نے شرح کنزالدقائق پھر امام محقق علی الاطلاق کمال الدین محمد بن الہمام نے شرح ہدایہ میں اس عظیم وجلیل تحقیق کے ساتھ ہمارے اس مذہب کی تائید وتوصیف اورقول خلاف کی تضعیف وتزییف فرمائی کہ اصلاً گنجائش کلام باقی نہ رکھی من شاء فلیشرف بمطالعتھما(جو چاہے ان کے مطالعہ مشرف ہو۔ت) او راکثر کتبِ مذہب میں تواس پر ایسا جزمِ قطعی فرمایا کہ قولِ خلاف کا نام تک نہ لیا، میں یہاں صرف چند کتابوں کی عبارتیں نقل کرتا ہُوں، وقایہ (۲) ونقایہ( ۳) تینوں کتابوں میں ہے : لایتخیر احد ھما بعیب الاٰخر۱؎۔

دونوں میں سے کسی کے عیب کی وجہ سے دوسرے کو فسخ کا اختیار نہیں ہے۔(ت)