Brailvi Books

فتح میں ہے کہ رخسار بھی منہ سے ملحق قرار پائیں گے۔ (ت)

 ( ۱؎ درمختار فصل فی المحرمات  مطبع مجتبائی دہلی ۱/۱۸۸)

اس طور پر صورت مستفسرہ میں مطلقا حکم حرمت ہے اور اگر زید انکار شہوت کرے مسموع نہیں۔ واللہ تعالٰی اعلم۔

مسئلہ ۱۸۵: از نجیب آباد ضلع بجنور محلہ نواب پور مرسلہ نیاز اللہ خاں ۵ ربیع الاول شریف ۱۳۱۳ھ

کیا فرماتے ہیں علمائے دین اس مسئلہ میں کہ ایک شخص نے ایک عورت سے زنا کیا مدت تک ، اور پھر اس کی زندگی میں ا س کی بیٹی سے بھی حرام کیا یہاں تک کہ دس بر س تک اسے گھر میں ڈال کر پردہ میں رکھ کر حرام کرتا رہا۔ اب زنا سے توبہ کرکے نکاح کرنا چاہتا ہے آیا نکاح ہوسکتا ہے یا نہیں؟ بینوا تو جروا

الجواب: کسی وقت کسی حال اس سے نکاح نہیں ہوسکتا کہ ماں کے ساتھ حلال خواہ حرام کسی طرح صحبت کرنے بلکہ صرف بشہوت ہاتھ لگانے یابوسہ لینے سے بیٹی ہمیشہ ہمیشہ حرام ہوجاتی ہے اور بیٹی کے ساتھ ان معاملات سے ماں۔

درمختار میں ہے:

حرم ایضا بالصھریۃ اصل مزنیۃ اراد بالزناء الوط الحرام واصل ممسوستہ بشھوۃ والمنظور الی فرجھا الداخل وفروعھن ۲؎ اھ ملخصا۔ واﷲ تعالٰی اعلم۔

مزنیہ کی اصل بھی مصاہرۃ کے طورپر حرام ہوگئی زنا سے مراد حرام وطی ہے۔ اور شہوت کے ساتھ مس شدہ عورت اور جس کی فرج داخل پر شہوت سے نظرپڑی ہو کی اصل اور ان کی فرع حرام ہوگی اھ ملخصا (ت) واللہ تعالٰی اعلم۔

(۲؎ درمختار    فصل فی المحرمات    مطبع مجتبائی دہلی    ۱/۱۸۸)

مسئلہ ۱۸۶ تا ۱۸۸: از ٹاہ نگریا مرسلہ نیاز محمد خان ۱۲ رجب ۱۳۱۳ھ

کیا فرماتے ہیں علمائے دین مسائل ذیل میں :

(۱) استاد کی بیٹی سے نکاح جائز ہے یا نہیں؟

(۲) شاگرد اناث سے استاد کا نکاح جائز ہے یا نہیں؟

(۳) بھتیجے کا نکاح چچاکی بی بی سے درحا لیکہ محارم سے نہ ہوجائز ہے یا نہیں؟بینوا تو جروا

الجواب:ان سب سے نکاح جائز ہے جبکہ محارم نہ ہوں۔

قال اللہ تعالٰی: واحل لکم ماوراء ذالکم ۱؎

 (محرمات مذکورہ کے ماسوا تمھارے لیے حلال ہیں۔ ت) واللہ تعالٰی اعلم

 (۱؎ القرآن   ۴/۲۴)

مسئلہ ۱۸۹: از اٹاوہ مکان قاضی مظفرعلی صاحب ڈگری نویس منصفی مرسلہ شیخ دیدار بخش صاحب ۲۳ صفر ۱۳۱۴ھ

ہندہ کا نکاح نو برس کی عمر میں ہواتھا، اس کا شوہر جو بالغ تھا تین ماہ بعد نکاح کے نینی تال کو چلا گیا وہاں اس نے اپنا نکاح کیااور زوجہ ثانیہ سے اولاد ہوئی ۔ ہندہ شوہر سے نان ونفقہ کی طالب ہوئی، ا س نے کچھ التفات نہ کی، تب خواہان طلاق ہوئی، طلاق بھی نہ دی،بلکہ ایک عرصہ کے بعد زوجہ ثانیہ اور اولاد کو بھی چھوڑ کر کہیں چلا گیا، پانچ چارسال سے مفقود الخبر ہے، ہندہ  اب اپنا دوسرا نکاح کیاچاہتی ہے، اس معاملہ میں بنظر حالات جو مسئلہ شرعی ہو فرمائیے، اب عمر ہندہ پچیس سال کی ہے۔بینوا تو جروا

الجواب: ہر گزیوں نکاح نہیں کرسکتی،

قال اللہ تعالٰی:  والمحصنٰت من النساء ۲؎

 (شادی شدہ عورتیں حرام ہیں۔ ت)

 (۲؎ القرآن     ۴/۲۴)

اس پر لازم ہے کہ صبر وانتظارکرے یہاں تک کہ اس کے شوہر کی ولادت کو ستربرس گزر جائیں، اس کے بعد اس کی موت کا حکم کیا جائے

فی جواہر الاخلاطی یحکم بموتہ بعد سبعین  سنۃ وعلیہ الفتوی ۳؎

 (جواہر الاخلاطی میں ہے: گم شدہ کی عمر کے ستر سال پورے ہونے کے بعد اس کی موت کا حکم کیا جائے گا۔ اسی پر فتوٰی ہے۔ ت)

(۳؎ جواہر الاخلاطی    مسائل مفقود    قلمی نسخہ    ص۱۲۲)

ادعائے ضرورت وعذرجوانی حرام کو حلال نہیں کرسکتا۔ بہت کمسن لڑکیا ں کہ بیوہ ہوجاتی ہیں باتباع رسم ہنود عمر بھر نام نکاح نہیں لیتیں۔ اس وقت ضرورت وجوانی کدھر جاتی ہے۔ ہزاروں وہ ہیں جن کے شوہر زندہ موجود ہیں مگر ان کی طرف سے قطعاً برگشتہ و روگرداں، وہ اپنی عمر کیونکر کاٹتی ہیں! یہ جو بعض کا زعم ہے کہ چار سال گزرنے پر عورت کو نکاح ثانی کا اختیار امام مالک کے مذہب میں حاصل ہوجاتا ہے محض جہل۔ اور امام مالک رضی اللہ تعالٰی عنہ کے مذہب سے نا واقفی ہے ان کا مذہب یہ ہے کہ عورت حاکم شرعی کے حضور مستغیثہ ہو وہ بعد ثبوت مفقودی روز مرافعہ سے چار سال کی مہلت دے۔ اس کے گزرنے پر قاضی تفریق کرے۔ اب عورت عدت پوری کرکے نکاح کرسکتی ہے

پیش از حکم قاضی شرع اگر بیس برس گزر گئے تو وہ معتبر نہیں صرح بہ علماء المالکیۃ فی کتبھم (مالکی علماء نے اپنی کتب میں اس کی تصریح کی ۔ ت) اس مسئلہ کی تفصیل جلیل فتاوائے فقیر کتاب المفقود میں ہے۔ ت) واللہ سبحانہ وتعالٰی اعلم