Brailvi Books

مسئلہ ۱۰۷: مرسلہ جناب ولی محمد صاحب بیتاب مدرس سرشتہ تعلیم ریاست ہلکراندور بمبئی بازار

کیا فرماتے ہیں علمائے دین ومفتیان شرع متین اس مسئلہ کہ ہندہ ایک کمسن لڑکی کا نکاح اس کے دادا نے ایک نہایت ہی کمسن لڑکے زید سے کردیا، ہندہ اس وقت بالکل بالغہ ہے مگرزید نابالغ، کم از کم پانچ بر س اس کی بلوغت کو درکار ہیں، ہندہ اور زید میں زن وشوہر کا تعلق ہونا کیامعنی بلکہ ہندہ کی آج تک اپنے میکہ سے رخصتی ہی نہیں ہوئی، زید کے یہاں زید کے والد کی حین حیات سے جس کا انتقال یکایک ہوگیا اور گومشتبہ مگر اب تک نامعلوم کسی نہ کسی وجہ سے اس سانحہ کی خبر زید کے چچاتک کونہ دی گئی تھی ایک پردیسی نوجوان ملازم چلا آتا ہے زید کے والدمشتبہ جوانا مر گ کے بعد اس ملازم نے زیدکے مکان میں وہ رسوخ حاصل کیا کہ ہر سیاہ وسفید وہی کرتاہے اورا س کے چوبیس گھنٹہ اس مکان میں رہنے سے جہاں کوئی دوسرا بالغ مرد بطور رکن خاندان کے نہیں رہتاہے زید کے خاندان کو ایک زمانہ حقارت کی نظر سے دیکھتا ہے اور درپردہ مورد  اتہام ہے۔ زید کے چچا نے سانحہ مذکورہ بالا سے متعجب ہوکر اس ملازم کے گز شتہ چال چلن کی نسبت جو تحقیقات کی تومعلوم ہو اکہ ابتداء سے یہ ایک آوارہ چلن شخص ہے حتی کہ ا سے والدین نے بھی اس کو مکان سے نکال دیاتھا اس کے بعد وہ عرصہ تک ناٹکوں میں ناچتا رہا گاتا رہابجاتا رہا، اس تحقیق کے بعدمتاثر ہو کر زید کے چچا نے جو زید کاجائز طور سے سرپرست ہے زیدکی والدہ سے درخواست کی کہ اس  ملازم کو مکان سے علیحدہ کر دیا جائے۔ مگر زید کی والدہ نے یہ جواب دیا کہ ہرگزنہیں ہوسکتا چاہے کچھ بھی ہو، نہ ملازم مجھ سے نہ میں ملازم سے جدا ہوسکتی ہوں، ان تمام وقوعات سے ہندہ بخوبی واقف ہے، وہ سسرال جانے سے خودکی عصمت دری اورآبرو ریز ی کے خوف کے علاوہ اپنی جان معرض خطرہ میں سمجھتی ہے اس لیے سسرال ہرگز نہیں جانا چاہتی بلکہ اپنے خاندان کے حفظ آبرو کے لحاظ سے تفریق کے بعد دوسرا نکاح کرلینا چاہتی ہے۔ اس صورت میں ہندہ کے  لیے کیا حکم ہے؟ بینوا توجروا