Brailvi Books

وعلیکم السلام ورحمۃ اللہ وبرکاتہ، ''سگائی کرچکا'' کا لفظ خود ظاہر کرتا ہے کہ ''سگائی'' نسبت اور وعدہ نکاح کو کہتے ہیں نہ کہ نکاح کو، لڑکی والوں کا دے دیا یا دے چکا کہنامجلس وعد میں وعدہ پر محمول ہوگانہ کہ عقد نکاح پر، امام طحاوی کی شرح، فتح، درمختار اور ردالمحتار میں ہے کہ اگر مر د نے کسی کو کہاکہ تو نے مجھے لڑکی دی، توا س نے جواب میں کہاکہ میں نے دی، تو اگر یہ مجلس وعدہ اور منگنی ہو تو وعدہ اور منگنی ہے اور اگر مجلس عقد ہے تو نکاح ہے، پھر مسئولہ صورت میں نکاح کیسے ہوسکتا ہے جبکہ نکاح کے لیے دوگواہوں کی موجودگی بایں طور پر شرط ہے کہ وہ اس کو نکاح سجھیں۔ تنویر اور در میں ہے نکاح میں دوگواہوں کا ہونا جویہ سمجھیں کہ یہ نکاح ہے شرط قرار دیا گیا، یہ مذہب ہے بحر۔ا ور یہاں مذکور ہ صورت میں مجلس میں ہزار بھی ہوں تو کوئی بھی اس کو نکاح نہ سمجھیں گے کیونکہ منگنی کو وہ نکاح نہیں بلکہ اس کے مقدمات میں سے سمجھتے ہیں۔ واللہ تعالٰی اعلم۔ (ت)

 (۱؎ فتح القدیر        کتاب النکاح    مکتبہ نوریہ رضویہ سکھر    ۳/۱۰۳)

(۲؎ درمختار شرح تنویر الابصار    کتاب النکاح        مطبع مجتبائی دہلی    ۱/۱۸۶)

مسئلہ ۶۲: ا زچونیاں ضلع لاہور مسئولہ ضیاء الدین انچارج اصطبل گورنمنٹی ۸ شوال ۱۳۳۹ھ

کیا فرماتے ہیں علمائے دین اس مسئلہ میں کہ ایک شخص نے حسب ہدایت والد خو د جس نے اس  کی ہدایت کی تھی کہ اپنی فلاں دختر کاناطہ  اپنے فلاں برادر حقیقی کو دینا تب سے راضی ہوگیا چنانچہ اپنے والد کی موجودگی اور چند مسلمانوں کی مجلس میں اپنے برادر حقیقی کو مخاطب کرکے کہا میں نے اپنی فلاں نام والی دختر بالغہ کا ناطہ تمھارے فلاں بالغ کو دے دیا، والد پسر نے قبول کرلیا، آیا ہر دو ولیوں کے ایجاب وقبول سے یہ نکاح منعقدہو گیایا نہیں؟ اگر ہوگیا تو اب والدِ دختر اس کا اور جگہ نکاح کرسکتا ہے بغیرطلاق کے، اور ولی اور گواہان ونکاح خوانِ نکاح ثانی کے واسطے حکم شرع کیا ہے؟ بینوا توجروا

الجواب : ناتا دینا عرف میں منگنی کرنے کو کہتے ہیں اور منگنی نکاح نہیں، اس صورت میں جب تک عقد نکاح نہ ہو والدِ دختر دوسری جگہ اس کا نکاح کرسکتا ہے اور نکاح خواں وغیرہ پر کوئی الزا م نہیں، اور اگرکہیں کے عرف میں ناتا کرنا نکاح کردینے کو بھی کہتے ہیں تو وہاں دیکھا جائے گا کہ وہ مجلس جس میں یہ الفاظ ادا ہوئے عقد نکاح کے لیے تھی یامنگنی کے لیے، اگر منگنی کے لیے تھی تو وہی حکم ہے کہ نکاح نہ ہوا، اور والدِ دختر کو اختیار ہے، اور اگر نکاح کے لیے تھی اور حاضرین میں سے کم از کم دو شخصوں نے اس نکاح کے گواہ ہوسکتے ہوں وہ ایجاب و قبول سنے اور سمجھے کہ یہ نکاح ہورہا ہے تو نکاح ہوگیا اب دوسری جگہ اس کا نکاح نہیں ہوسکتا، والد دختر اور نکاح خواں اور گواہان نکاح ثانی جن کو معلوم تھاکہ اس کا نکاح پہلے ہوچکا ہے سب مبتلائے حرام ہوں گے،

درمختار میں ہے:

ھل اعطیتنیھا ان المجلس للنکاح فنکاح وان للوعد فوعد ۱؎۔ واﷲ تعالٰی اعلم

اگر ایک نے دوسرے کو کہا کیا تونے مجھے دی، دوسرے نے جواب میں ''دی'' کہا تواگر یہ مجلس نکاح ہو تو نکاح ہوگا، اور اگر مجلس وعدہ ہے تو منگنی ہوگی، واللہ تعالٰی اعلم۔ (ت)