Brailvi Books

مسئلہ ۴۲۴: از لصرات پر گنہ پڑادہ ریاست علاقہ ٹونک محلہ سلطانپورہ مسئولہ ابراہیم صاحب ۲۸ رمضان ۱۳۳۹ھ

کیا فرماتے ہیں علمائے دین اس مسئلہ میں کہ ایک شخص اپنی بیوی سے ۱۴سال سے علیحدہ  رہتا ہو عورت حاملہ تین ماہ کی ہواسی حمل سے لڑکی پیدا ہوئی اور لڑکی نے چودہ سال تک اپنی ماں کے پاس پرورش پائی باپ نے کسی قسم کی امدا د نہیں دی نہ کبھی لڑکی کو بلواکر دیکھا، ایسی صورت میں جوان لڑکی ۱۴ سال کی بالغ ہوگئی ہے لڑکی نے اپنی خوشی اور اس کی والدہ نے اپنی اجازت سے لڑکی کا نکاح کردیا باپ موجود نہ تھانکاح بھی ہم قوم سے ہوا یعنی غیر قبیلہ میں نہیں ہوا، یہ نکاح جائز رہا یا نہیں۔ بینوا تو جروا

الجواب:شرعاً وہ لڑکی اسی کی ہے اگرچہ کتنے ہی برسوں سے عورت سے علیحدہ ہو فقط چودہ برس کی عمرہونا بلوغ کے لئے کافی نہیں۔ اگر حیض نہ آیا ہو نا بالغہ ہے، نکاح کےلئے اس کی اجازت کوئی چیز نہیں، اور ماں کا کیا ہوا نکاح باپ کی اجازت پر موقوف رہے گا، اگر جائز کردے گا جائز ہوجائے گا رد کردے گا باطل ہوجائے گا، اور اگر لڑکی واقعی بالغہ ہوگئی تھی حیض آچکا تھا تو وہ کفو میں اپنے نکاح کی مختار ہے غیر کفو میں  بغیر اجازت باپ کے کہ اس نے پیش از نکاح غیر کفو جان کر صراحۃً اجازت دی ہو لڑکی کا نکاح اس کی اجازت سے باطل ہے، غیر کفو ہونے کے لئے یہی ضروری نہیں کہ کم قوم ہو بلکہ مذہب یا پیشہ یا چال چلن میں ایسا کم کہ اس کے ساتھ نکاح ہونا لڑکی کے لئے باعث بدنامی ہو یہ بھی غیر کفو ہونا ہے اگرچہ خاص اسی خاندان کا ہو۔ واللہ تعالٰی اعلم۔

مسئلہ ۴۲۵: از سمیتہ ڈاکخانہ دراپختہ تحصیل ڈیرہ غازی خان مسئولہ اللہ بخش صاحب ۵شوال ۱۳۳۹ھ

کیا فرماتے ہیں علمائے دین ا س مسئلہ میں کہ زید ایک عورت زینب پر عاشق ہوا باوجود اہل وعیال کے اس کے عشق میں مغلوب ہو کر اپنی دختر صغیرہ چارسالہ کا نکاح حق مہر زینب پر برادر زینب عمرو زوجہ سے کردیا بعداس کے زیدنے زینب سے عقد کرکے سرمیل کیا اور اس وقت بیمار ہوا، بعد ہفتہ کے فوت ہوگیا، اب وہ لڑکی بالغہ ہوکر کہتی ہے کہ میرے باپ نے مرض عشق میں جو میرا نکاح نااہل غیر پردہ دار سے کردیاہے مجھے منظور نہیں،آیا یہ نکاح صحیح ہے یا نہیں؟ بینوا تو جروا

الجواب: صغیرہ کا نکاح کہ اس کے باپ نے کیالازم ہے، صغیرہ کو بعد بلوغ اس کے فسخ کا کوئی حق نہیں اور عذرات کہ سوال میں لکھے مہمل وبے معنٰی ہیں شرع میں ان کی کوئی اصل نہیں۔

درمختار میں ہے:

لزم النکاح ولوبغبن فاحش او من غیر کفو ان کان المزوج ابااوجد الم یعرف منھما سوء الاختیار ۱؎۔ واﷲ تعالٰی اعلم۔

نکاح کردینے والا باپ یا دادا ہو اگرچہ یہ نکاح غیر کفو یا انتہائی کم مہر پر کیا ہو تو بھی لازم ہوجائے گا بشرطیکہ باپ دادا سوء اختیار سے معروف نہ ہوں۔ واللہ تعالٰی اعلم۔ (ت)

 (۱؎ درمختار    باب الولی        مطبع مجتبائی دہلی    ۱/۱۹۲)