Brailvi Books

تنویر الابصار میں ہے:

الولی فی النکاح العصبۃ بنفسہ علی ترتیب الارث والحجب فان لم یکن عصبۃ فالو لایۃ للام ثم للاخت ثم لولدالام ثم لذوی الارحام العمات ثم الاخوال ۱؎۔

نکاح کا ولی، وراثت اور مانع ہونے کی ترتیب کے مطابق عصبات بنفسہ ہوتے ہیں، اگر یہ نہ ہوں تو پھر ولایت ماں کو حاصل ہوگی، پھر بہن کو پھر والدہ کی طرف سے بھائی پھر ذوی الارحام میں پھوپھی پھر ماموں کو حاصل ہوتی ہے۔ (ت)

(۱؎ درمختار    باب الولی        مطبع مجتبائی دہلی    ۱/۱۹۳)

دختر کی نابالغی میں چچا یا بالغ ہوکر بھائی ا گر اس کانکاح ایسے شخص سے کردے گا جو اس لڑکی کا کفو ہو یعنی مذہب یا نسب یا پیشہ یا چال چلن وغیرہ میں اتنا کم نہ ہو کہ اس کے ساتھ اس دختر کا نکاح باعث ننگ وعار ہو نہ دختر کے مہرمثل میں کمی فاحش کرے مثلا لاکھ روپیہ مہر مثل ہو یہ پچاس ہزار باندھ دیں، جب ان دونوں نقصانوں سے خالی ہو تو چچا یا بھائی کا وہ کیا ہوا نکاح نافذ ہوگا نہ لڑکی سے اذن لینے کی  ان کو حاجت نہ اطلاع دینے کی نہ وقت نکاح لڑکی کے وہاں موجود ہونے کی، یہ سب بے ضرورت امورہیں۔

درمختار میں ہے:

للولی انکاح الصغیر والصغیرۃ جبرا۱؎۔

باپ دادا کو نابالغہ پر جبری نکاح کی ولایت ہے۔ (ت)

 ( ۱؎ درمختار    باب الولی        مطبع مجتبائی دہلی    ۱/۱۹۲)

اسی میں ہے:

لوزوجھا الاقرب حیث ھو جاز النکاح ۲؎۔

اقرب جہاں بھی نکاح کرے جائز ہوگا۔ (ت)

(۲؎درمختار    باب الولی        مطبع مجتبائی دہلی    ۱/۱۹۴)

ماں یا ماموں کو اس نکاح پر اصلاً اعتراض نہیں پہنچ سکتا، ہاں لڑکی کہ دوشیزہ ہے اگر بالغہ ہوتے ہی معاً کہہ دے گی کہ میں اس نکاح سے راضی نہیں، یا اول سے اسے اطلاع نکاح نہ تھی تو بعد بلوغ جس وقت خبر پائی فوراً نکاح سے اپنی ناراضی ظاہر کرے تو اس صورت میں البتہ خود اس کو اختیار ہوگا کہ حاکم شرع کے حضور رجوع کرکے چچا یا بھائی کا کیاہوا نکاح فسخ کرالے ،

درمختارمیں ہے:

ان کان المزوج غیر الاب وابیہ ان کان من کفو وبمھر المثل صح ولھما ای لصغیر وصغیرۃ خیا ر الفسخ بالبلوغ اوالعلم بالنکاح بعدہ بشرط القضاء للفسخ وبطل خیار البکربالسکوت لو  عالمۃ بالنکاح ولایمتد الی اٰخر المجلس۳؎۔

اگر نکاح دینے والا باپ دادا نہ ہو تو کفواورمہر مثل کی صورت میں نکاح صحیح ہے لیکن نابالغ اور نابالغہ کو بلوغ پر یا بلوغ کے بعد علم ہونے پر بشرط قضاء فسخ کا اختیار ہوگا، اور بالغہ باکرہ کا اختیار اس کو علم ہوجانے پر سکوت کی وجہ سے باطل ہوجائے گا، اور مجلس کے اختتام تک یہ اختیار باقی نہ رہے گا، (ت)

 (۳؎درمختار    باب الولی        مطبع مجتبائی دہلی    ۱/۹۳۔ ۱۹۲)

ہاں چچا یا بھائی جس سے نکاح کردیں اگر وہ بمعنی مذکور دختر کا کفو نہ ہو اگرچہ ہم قوم ہو یا مہر مثل میں کمی فاحش کریں تو سرے سے نکاح ہوگا ہی نہیں۔

درمختار میں ہے:

ان کان المزوج غیرھما لایصح النکاح من غیرکفو، او بغبن فاحش اصلا۱؎۔ واﷲ تعالٰی اعلم۔

اگر غیر باپ دادا نے نابالغہ کا نکاح غیر کفو میں یا انتہائی کم مہر سے دیا تو بالکل جائز نہ ہوگا۔ واللہ تعالٰی اعلم۔

 (۱؎ درمختار     باب الولی    مطبع مجتبائی دہلی    ۱/۱۹۲)

باپ کی اجازت تحریری کی عبارت محتاج نظرہے، دیکھا جائے گا اور اب اس کا کیا اثر ہے اور اس کی چنداں حاجت بھی نہیں کہ ولی شرعی موجود ہے۔ واللہ تعالٰی اعلم۔