Brailvi Books
 |
فتاویٰ رضویہ جلد نمبر۱۱(کتاب النکاح) |
152 - 1581
مسئلہ ۳۰۲: مسئولہ حافظ محمد علاؤ الدین صاحب پیش امام مسجد مقام بلرام پور ڈاک خانہ انگہ ڈیرہ ضلع مان بھوم (۱) جن عورتوں سے نکاح حرام ہے وہ کون کون ہیں؟ عام فہم ہو خصوصاً میرے سمجھنے کے قابل۔ (۲) جو عورت زیدکے بڑے بھائی کے نکاح میں آچکی ہو، بعد مرنے بڑے بھائی کے اس عورت یعنی اپنی بھاوج سے زید عقد کرسکتا ہے یا نہیں؟ اس کا جھگڑا پڑا ہوا ہے اس کا خلاصہ تحریر فرمائیں، فقط۔
الجواب (۱) حرمت کے اسباب متعدد ہیں: اول نسب جیسے ماں بیٹی، بہن، خالہ، پھوپھی، بھتیجی، بھانجی۔ دوم رضاعت ، دودھ کے رشتہ سے یہ عورتیں، دودھ پلانے والی ماں اور اس کی بیٹی بہن اور جس نے اس کا دودھ پیا بیٹی اور جن مرد و عورت کا دودھ پیا ان کی بہنیں خالہ پھوپھی اور اپنے رضاعی بھائی بہن کی اولاد یا اپنے بھائی بہن کی رضاعی اولاد بھتیجی بھتیجیاں، وقس علیہ۔ سوم مصاہرت کہ اپنے اصول مثلاً باپ دادا نانا اپنی فروع مثلاً بیٹا پوتا نواسہ ان کی بیبیاں یاجن عورتوں کو انھوں نے بشہوت ہاتھ لگایاہو، یونہی اپنی بی بی یا مدخولہ کی ماں ، دادی، نانی۔ چہارم شرک یعنی غیر کتابی کافرہ عورت مسلمان پر حرام ہے۔ پنجم ارتداد جو عورت مسلمان ہوکر اسلام سے نکل جائے اس سے نکاح حرام ہے اگرچہ وہ کتابیوں ہی کا دین اختیار کرے۔ ششم پانچویں، یعنی چارعورتیں نکاح میں موجود ہوں تو پانچویں حرام ہے۔ ہفتم دو محارم میں جمع کرنا، مثلاً ایک عورت نکاح میں ہے تو جب تک وہ نکاح میں رہے اس کی بہن پھوپھی خالہ بھتیجی بھانجی سے نکاح حرام ہے۔ ہشتم جب کوئی آزاد عورت نکاح میں ہو اس کے ہوتے ہوئے کنیز سے نکاح جائز نہیں۔ نہم جس عورت کو تین طلاقیں دے چکا جب تک حلالہ نہ ہو اس سے نکاح حرام ہے۔ دہم جس عورت سے لعان کرچکا جب تک اپنے نفس کو تکذیب نہ کرے اس سے نکاح نہیں کرسکتا۔ یازدہم وہ عورت کہ دوسرے کے نکاح میں ہے۔ دواز دہم وہ عورت کہ دوسرے کے عدت میں ہے۔ جزئیات بہت کثیر ہیں تفصیل کواجزا درکار ہیں، یہ چند اجمالی باتیں ہیں۔ واللہ تعالٰی اعلم۔ (۲)عدت گزرنے کے بعد کرسکتاہے۔ واللہ تعالٰی اعلم۔
مسئلہ ۳۰۴: از دوارکا اوکھاکاٹھیا وار مرسلہ نائیک حبیب خان ۳ جمادی الآخرہ ۱۳۳۵ھ مصدر بوارق معانی، مظہر شوارق فیض رسانی، ادام اللہ عنایتکم، السلام علیکم، دست بستہ آداب،۔ خیریت طرفین کا خواستگار ہوں، وہ لڑکی کہ جس نے بچپن میں میری اس ہمشیرہ کا دودھ ایک یاد ودفعہ نیند کی حالت میں پیاہو کہ اس کی اور میری والدہ ایک ہے اور والد جدا۔ آیا وہ لڑکی میرے نکاح میں آسکتی ہے یا نہیں؟ اور اگر وہ لڑکی میرے نکاح میں آچکی ہو اور دودھ پلانے کی واردات پیچھےظاہر ہوئی اس کے لیے کیا فتوی ہے؟ براہ نوازش جلد مطلع فرماکر فخر بخشیں۔
الجواب : جس لڑکی نے سائل کی بہن کا دودھ پیا اگرچہ اس کے سوتے میں۔ اگرچہ ایک ہی بار، اگرچہ ایک ہی قطرہ، اگرچہ وہ بہن سائل سے صرف ماں میں شریک اور باپ میں جدا تھی، وہ لڑکی سائل کی بھانجی ہوگئی اور اس سے اس کا نکاح حرام قطعی ہے، اور اگر نادانستگی میں ہوگیا اور اب بہ ثبوت شرعی رضاعت ثابت ہوئی تو سائل پر فرض ہے کہ فوراً فوراً اسے جدا کردے کہ وہ اس کی بھانجی اور مثل حقیقی دختر کے ہے، پھر اگر جماع واقع ہوا، تو مہردینا آئے گا جو مہر مثل ومہر مسمٰی میں کم ہو اور عورت اس کے چھوڑنے کے بعد تین حیض عدت کرے گی، پھر جس سے چاہے نکاح کرے گی، واللہ تعالٰی اعلم۔