Brailvi Books
 |
فتاویٰ رضویہ جلد نمبر۱۱(کتاب النکاح) |
112 - 1581
مسئلہ ۲۰۳: ۵ رجب ۱۳۱۷ھ کیا فرماتے ہیں علمائے دین اس مسئلہ میں کہ معاذاللہ ساس سے زنا کے باعث جب منکوحہ حرام ہوجائے تو اس سے پردہ بھی فرض ہوجاتا ہے یا وہ مثل محارم کے ہوجاتی ہے کہ دیکھنا، چھونا، تنہا مکان میں رہنا جائز ہے۔ بینوا توجروا
الجواب: مذہب اصح یہی ہے کہ حرمت مصاہرت اگرچہ معاذاللہ زنا سے ناشی ہوئی ہو عورت کو مثل محارم کے کردیتی ہے تو نظر ومس بہ شہوت تو قطعاً حرام ہوگئے اور بلاشہوت میں حرج نہیں جبکہ اپنے یا عورت کے لیے حدوث شہوت کا اندیشہ نہ ہو۔ بحالت اندیشہ بلاشہوت بھی دیکھنا چھونا حرام ہوگا بلکہ اگر شک بھی ہو کہ شاید مجھے یا عورت کو شہوت پیدا ہو، نہ ہو جب بھی حکم حرمت ہے، تنہا ایک مکان میں جانے کی تواصلا اجازت نہیں کہ یہ خواہی نخواہی مظنہ شہوت ہے خصوصاً منکوحہ میں جو ایک زمانے تک ا س کے نکاح میں رہ چکی اور باہم حجاب وتکلف مرتفع رہاتھا تو عندالانصاف جبکہ منکوحہ سے معاذاللہ حرمت مصاہرت پیداہو اسے مثل اجنبیہ تصور کرنے ہی میں احتیاط ہے وباللہ العصمۃ، درمختارمیں ہے:
ینظر الرجل من محرمہ ھی من لایحل لہ نکاحہا ابدابنسب اوبسبب ولوبزنا، الی الراس والوجہ والصدروالساق والعضدان أمن شہوتہ وشھوتہا وان لم یأمن اوشاھی لایحل النظر والمس، کشف الحقائق لابن سلطان والمجتبی ۱؎ اھ ملتقطا۔
محرمہ وہ عورت ہے جس سے ابدی طورپر نکاح حرام ہو، نسب کی وجہ سے محرمہ ہو یا کسی سبب کی وجہ سے وہ سبب زنا ہی کیوں نہ ہو، شہوت کا خد شہ نہ ہو تو ایسی محرم عورتوں کے سر، چہرہ،سینہ، پنڈلی اور بازو کو دیکھنا مردکے لیے جائز ہے اور اگر مرد یا عورت کو شہوت کا خدشہ ہو یا کوئی ان میں سے حالت شہوت میں ہو تو پھر محرمہ کو چھونا اور دیکھنا جائز نہیں۔ کشف الحقائق ابن سلطان اور مجتبٰی اھ ملتقطا (ت)