Brailvi Books
 |
فتاویٰ رضویہ جلد نمبر۱۰(کتاب الزکٰوۃ، صوم، حج) |
168 - 198
بالجملہ : قول وجوب من حیث الدلیل اظہر اور نظر ایمانی میں اَحب وازہر ہے اور قریب وجوب کہ علمائے مذاہب اربعہ بلکہ خود امام اعظم رضی اللہ تعالٰی عنہ کا منصوص اس کے قریب اور حکماً مقارب، اور قول سنت اس کے منافی نہیں فقہاء واجب کو بھی ''کہ سنت یعنی جو حدیث سے ثابت ہو'' سنت بولتے ہیں۔ امام محمد رحمہ اللہ تعالٰی علیہ نے نماز عید کو کہ حنفیہ کے نزدیک واجب، ہے سنت کہا بلکہ اطلاق اعم میں مستحب ومندوب بھی واجبات کو شامل، اور فرض وواجب جبکہ حکم عمل واثم تارک میں مشارک، اور شافعیہ کے یہاں فرق اصطلاح نہیں تو ان کے نزدیک واجب پر اطلا ع فرض اور حج سے تمثیل بعید نہیں، اس تقریر پر سب افعال متفق ہوجائیں گے اور بہ تصریح علماء مثل علامہ شامی وغیرہ اہدائے وفاق ابقائے خلاف، سے اولیٰ اور بیشک وجوب وقرب وجوب کہ جمہورائمہ مذاہب جس کی تصریح کرتے ہیں، تارک کے اثم پر یک زبان، بہرحال جزم کیاجاتا ہے کہ باجود قدرت تارک زیارت قطعاً محروم وملوم وبد بخت ومشوم وآثم وگنہگار و ظالم و جفا کار ہے، والعیاذ باللہ ممالا یرضاہ، لاجرم سلفاً وخلفاً علماء دین وائمہ معتمدین تارکِ زیارت پر طعن شدید وتشنیع مدید کرتے آئے کہ ترک مستحب ہر گز نہیں ہوسکتی، علامہ رحمت اللہ علیہ رحمۃ اللہ تلمیذ امام ابن ہمام نے لباب میں فرمایا:''ترک زیارت بڑی غفلت اور سخت بے ادبی ہے۔''۱؎
(۱؎ لباب المناسک مع ارشاد الساری باب زیارۃ سید المرسلین دارالکتاب العربی بیروت ص۳۳۴)
اور امام ابن حجر مکی قدس سرہ الملکی نے توجوہر منظم میں تارک زیارت پر قیامت کبرٰی قائم فرمائی، فرماتے ہیں رحمہ اللہ تعالٰی: ''خبردار ہو حضوراقدس صلی اللہ تعالٰی علیہ وسلم نے تجھے ترک زیارت سے حد درجہ ڈرایا اور اس کی آفتوں سے وہ کچھ بیان فرمایا کہ اگرتو اسے غور سے سمجھے تو اپنے اوپر ہلاکت وبدانجامی کا خوف کرے، حضور نے صاف فرمادیا کہ ترک زیارت جفا ہے۔
اور یونہی صحیح حدیث میں آیا کہ ''میرا ذکر سن کر مجھ پر درود نہ پڑھنا جفا ہے۔'' اس سے ثابت ہوا کہ باوجود قدرت ترکِ زیارت اور ذکر اقدس سن کر ترک درود، دونوں یکساں ہیں کہ دونوں جفا ہیں، تو تارک زیارت پر ان سب عذابوں اور شناعتوں کا خو ف ہے جو تارک درود کے لیے حدیثوں میں آئیں کہ وہ شقی، نامراد ذلیل وخوار، مستحق نار، خدا ورسول سے دور ہے، اس پر ان سب عذابوں اور نیز مردود بارگاہ ہونے کی دعا جبریل امین وحضور سید عالم صلی اللہ تعالیٰ علیہ وسلم نے فرمائی، وہ راہ جنت بھول گیا، حد بھر کا بخیل، ملعون، بے دین ہے، اپنے نبی صلی اللہ تعالیٰ علیہ وسلم کے دیدار جمال جہاں آرا سے محروم رہے گا،