Brailvi Books

کُفْر کی شَبِ دَیجور
چھٹی صدی عیسوی میں  شرک اوربُت پرستی کی بیماری کائنات اَرضی کے گوشہ گوشہ کوایک وبا کی طرح اپنی لپیٹ میں  لےچکی تھی۔ مخلوق کا رشتہ اپنےخالقِ حقیقی سےٹوٹ چکا تھا،ان کی اخلاقی، معاشرتی، معاشی اور سیاسی زندگی میں  ایسے تباہ کُن فسادات پیداہوچکےتھےجن کا تصور ہی سعید روحوں پرلرزہ طاری کرنے کے لئے کافی ہے۔ 
میٹھےمیٹھےاسلامی بھائیو! اس دور میں  چہار سو شبِ دَیجور (اندھیری رات) کا عالم تھا اورانسان خدافراموش ہی نہیں  بلکہ خود فراموش بھی بن چکا تھا، غفلت و گمراہی کی گم گشتہ راهوں  میں  بھٹک کر اسے یہ تک نہ یاد رہا کہ وہ خالقِ کائنات کی شانِ تخلیق کا شاہکار ہے اور جس کا مقصد ِتخلیق صرف یہ ہے کہ وہ اپنے خالق ومالک کو پہچانے اور عشق و محبت کے جذبات سے سرشار ہو کر اس کی بارگاہِ عظمت وکمال میں  بےخودی سے اپنا سرِنیاز جھکا دے اور اپنی بندگی، بےچارگی اور بیکسی وبےبسی کا اظہار کرے مگر ہائے افسوس! صد کروڑ افسوس! یہ سب کچھ کرنے کے بجائے اس کمزور وبے بس انسان نے حقیقی معبود کو چھوڑ کر فانی مخلوق کو اپنا معبود بنا لیا اور عزت و کرامت کی خِلْعَتِ فاخِرہ (عمدہ و بیش قیمت لباس) کو چاک کر کے بےجان پتھروں  کے سامنے جھک گیا۔