Brailvi Books

نبی اور اُمّی کا ترجمہ:
	اس کے بعد آپ کی توصیف میں ’’نبی ‘‘فرمایا گیا، اس کا ترجمہ سیدی اعلیٰ حضرت  رَحْمَۃُاللہِ تَعَالٰی عَلَیْہِ نے ’’غیب کی خبریں دینے والے‘‘ کیا ہے اور یہ نہایت ہی صحیح ترجمہ ہے کیونکہ نَبَاْ ’’ خبر‘‘ کے معنیٰ میں ہے اور نبی کی منفرد خبر بطورِ خاص غیب ہی کی خبر ہوتی ہے تو اس سے مراد غیب کی خبر لینا بالکل درست ہے۔ قرآنِ کریم میں یہ لفظ خبر کے معنیٰ میں بکثرت استعمال ہوا ہے۔ ایک جگہ ارشاد ہوا:
 ’’ قُلْ ہُوَ نَبَؤٌاعَظِیۡمٌ ‘‘ (1)ترجمۂکنزُالعِرفان: تم فرماؤ وہ (قرآن) ایک عظیم خبر ہے۔
 	ایک جگہ فرمایا:
’’ تِلْکَ مِنْ اَنۡۢبَآءِ الْغَیۡبِ نُوۡحِیۡہَاۤ اِلَیۡکَ‘‘ (2)ترجمۂکنزُالعِرفان:یہ کچھ غیب کی خبریں ہیں جو ہم تمہاری طرف وحی کرتے ہیں۔
	ایک جگہ فرمایا:
’’فَلَمَّاۤ اَنۡۢبَاَہُمْ بِاَسْمَآئِہِمْ‘‘ (3)ترجمۂکنزُالعِرفان:تو جب آدم نے انہیں ان اشیاء کے نام بتادیئے۔
	ان کے علاوہ بکثرت آیات میں یہ لفظ اس معنیٰ میں مذکور ہے۔
	 پھر یہ لفظ یا فاعل کے معنی میں ہوگا یا مفعول کے معنی میں۔ پہلی صورت میں اس کے معنی ہیں ’’غیب کی خبریں دینے والے ‘‘اور دوسری صورت میں اس کے معنی ہوں گے’’ غیب کی خبریں دیئے ہوئے ‘‘ اور ان دونوں معنی کی تائید قرآنِ کریم سے ہوتی ہے ۔پہلے معنی کی تائید اس آیت سے ہوتی ہے:
’’ نَبِّئۡ عِبَادِیۡۤ ‘‘ (4)
ترجمۂکنزُالعِرفان:  میرے بندوں کو خبردو۔ 
	دوسری آیت میں فرمایا:
’’ قُلْ اَؤُنَبِّئُکُمۡ ‘‘ (5)ترجمۂکنزُالعِرفان:(اے حبیب!)تم فرماؤ ،کیا میں تمہیں بتادوں ؟
ـــــــــــــــــــــــــــــــــــــــــــــــــــــــــــــــــــــــــــــــ 
1…ص:۶۷۔
2…ہود:۴۹۔
3…البقرہ:۳۳۔4…حجر:۴۹۔5…ال عمران :۱۵۔