Brailvi Books

مریضوں کی عِیادتوں کیلئے گھر وں اور اَسپتالوں میں جانے کے تعلُّق سے میری سستیوں اور کوتاہیوں کے سبب کہیں کوئی مجھ سے ناراض ہو کر سنّتوں بھرے مَدَنی ماحول سے دُور نہ جا پڑے!میرے خیال میں اگر کسی کے ’’سکھ‘‘ میں حصّہ نہ بھی لیا جائے توآدَمی اتناناراض نہیں ہوتا جتنا ’’دُکھ‘‘ یعنی بیماری، پریشانی یا وفات کے مُعامَلات میں ہمدردی نہ کرنے والے سے ناراض ہوتا ہے! اِس ضِمْن میں مَدَنی ماحول ہی کی ایک حِکایت پیش کرتا ہوں،چُنانچِہ
۔۔۔۔۔۔تومیں دعوتِ اسلامی والوں سے دُور ہو گیا
        ایک غریب اسلامی بھائی کا قصّہ زیادہ پُرانانہیں، اُنہوں نے (سگِ مدینہعُفِیَ عَنہُ کو ) جوکچھ بتایا وہ اپنے الفاظ میں عرض کرتا ہوں:’’میں برسوں سے مَدَنی ماحول سے وابَستہ تھا،اپنی بِساط بھر دعوتِ اسلامی کاکچھ نہ کچھ مَدَنی کام بھی کرلیا کرتا تھا۔ میں بیمار ہوا، مَرَض نے طول پکڑا حتّٰی کہ صاحِبِ فِراش ہو گیا اور چھ ماہ تک بسترِعَلالت پر پڑا رہا،صدکروڑ افسوس! بیماری کے اُس مکمَّل دَورانیے میں ہمارے شہر کے کسی’’ میٹھے میٹھے اسلامی بھائی ‘‘ کامجھ دُکھیارے کے غریب خانے پر تشریف لاکرعِیادت کرناتوکُجا،کسی نے فون بھی نہ کیا،بلکہ یقین مانئے دلجوئی کیلئے S.M.S. کرنے تک کی کسی نے زَحْمت گوارا نہ فرمائی۔ بِنا بَریں  دعوتِ اسلامی والوں سے ایک دم میرا دل ٹوٹ گیا اورمیں ان سے دُور ہو گیا، ہاں ایک نیک دل بندہ جو عَمَلاً دعوتِ اسلامی میں نہیں ہے اُس نے مجھ پر کمال دَرَجہ شفقت کامظاہَرہ کیا،حتّٰی کہ وہ مجھے ڈاکٹروں کے پاس بھی لے جاتارہا ،میرے دل میں اُس کی مَحَبَّت راسِخ  ہوگئی اورمیں اُس کے قریب تَرہو گیا۔‘‘