(۱۲۷۳)۔۔۔۔۔۔ حضرتِ سیدنا اُبَیّ بن کَعْب رضی اللہ تعالی عنہ فرماتے ہیں کہ ''ہمارا ایک گودام تھا جس میں ہم کھجوریں خشک کیا کرتے تھے ۔جب میں نے دیکھا کہ اس میں کمی آتی جارہی ہے تو ایک رات میں نے پہر ہ دیا تو میں نے بالغ لڑکے کی مثل ایک جانور دیکھا۔میں نے اسے سلام کیا تو اس نے سلام کا جواب دیاپھر میں نے پوچھا،'' تم جن ہو یا انسان؟'' اس نے کہا ،''جن ہوں۔'' میں نے کہا، ''اپناہاتھ مجھے دکھاؤ۔'' میں نے دیکھا کہ اس کا ہاتھ کتے کے پنجے کی طرح ہے اور اس پر بال ہیں ۔ میں نے پوچھا'' کیا جن ایسے ہی ہوتے ہیں ؟'' اس نے کہا، ''آپ تو جانتے ہی ہیں کہ مجھ سے طاقتور جن بھی موجود ہیں۔'' پھر میں نے پوچھا، ''تم میری کھجوریں کیوں چوری کرتے ہو ؟'' اس نے کہا،'' مجھے پتہ چلا تھا کہ آپ صدقہ کو پسند کرتے ہیں لہذا! میں نے آپ کے غلے میں سے ہی لینا شروع کردیا۔''
میں نے اس سے پوچھا، ''کون سی چیز ہمیں تمہارے شر سے بچا سکتی ہے؟'' اس نے کہا ،''آیت الکرسی" جو شخص شام کو اسے پڑھے گا وہ صبح تک ہم ( یعنی جنات ) سے محفوظ رہےگا اور جو صبح کو پڑھے گا وہ شام تک ہم سے بچارہے گا۔ پھر جب صبح ہوئی تو میں نے اسے چھوڑ دیا اور صبح رسول اللہ صلَّی اللہ تعالیٰ علیہ واٰلہٖ وسلّم کی بارگاہ میں حاضر ہوا اور انہیں اپنا واقعہ سنایا تو آپ نے فرمایا، ''اس خبیث نے بالکل سچ کہا۔''