Brailvi Books

جہنم میں لیجانے والےاعمال (جلد اول)

428 - 857

کتاب الصلٰوۃ

نماز کا بیان

کبيرہ نمبر76:        جان بوجھ کر نماز چھوڑ دينا

    اللہ عزوجل نے جہنميوں کے بارے ميں ارشاد فرمايا:

مَا سَلَکَکُمْ فِیۡ سَقَرَ ﴿42﴾قَالُوۡا لَمْ نَکُ مِنَ الْمُصَلِّیۡنَ ﴿ۙ43﴾وَ لَمْ نَکُ نُطْعِمُ الْمِسْکِیۡنَ ﴿ۙ44﴾وَ کُنَّا نَخُوۡضُ مَعَ الْخَآئِضِیۡنَ ۙ﴿45﴾

ترجمۂ کنز الایمان:تمہيں کيا بات دوزخ ميں لے گئی وہ بولے ہم نماز نہ پڑھتے تھے اور مسکين کو کھانا نہ ديتے تھے اوربيہودہ فکر والوں کے ساتھ بيہودہ فکريں کرتے تھے۔(پ29، المدثر:42تا45)

(1)۔۔۔۔۔۔سیدناامام احمد بن حنبل رحمۃاللہ تعالیٰ علیہ نے روایت کیا ہے کہ شہنشاہِ خوش خِصال، پیکرِ حُسن وجمال صلَّی  اللہ تعالیٰ علیہ وآلہ وسلَّم کا فرمانِ عالیشان ہے :''آدمی اور کفر کے درميان نماز کوچھوڑنے کا فرق ہے۔''

(2)۔۔۔۔۔۔سیدناامام مسلم رحمۃاللہ تعالیٰ علیہ کی روایت یوں ہے کہ دافِعِ رنج و مَلال، صاحب ِجُودو نوال صلَّی اللہ تعالیٰ علیہ وآلہ وسلَّم کا فرمانِ عالیشان ہے :''آدمی اور شرک یا کفر کے درمیان فرق نماز کوچھوڑنا ہے۔''

(3)۔۔۔۔۔۔سیدناامام ابو داؤد اورسیدنا امام نسائی رحمۃاللہ تعالیٰ علیہما کی روایت اس طرح ہے کہ رسولِ بے مثال، بی بی آمنہ کے لال صلَّی اللہ تعالیٰ علیہ وآلہ وسلَّم کا فرمانِ عالیشان ہے :''آدمی اور کفر کے درمیان نماز چھوڑنے کا فرق ہے۔''

(4)۔۔۔۔۔۔سیدناامام ترمذی رحمۃاللہ تعالیٰ علیہ نے یوں روایت کیا ہے کہ سیِّدُ المُبلِّغین، رَحْمَۃٌ لّلْعٰلَمِیْن صلَّی اللہ تعالیٰ علیہ وآلہ وسلَّم کا فرمانِ عالیشان ہے کہ ''کفر اور ايمان کے درميان نماز چھوڑنے کا فرق ہے۔''

(5)۔۔۔۔۔۔سیدناامام ابن ماجہ رحمۃاللہ تعالیٰ علیہ کی روایت یوں ہے کہ خاتَم ُالْمُرْسَلین، رَحْمَۃٌ لّلْعٰلمین صلَّی اللہ تعالیٰ علیہ وآلہ وسلَّم کا فرمانِ عالیشان ہے :''بندے اور کفر کے درمیان فرق نماز کوچھوڑنا ہے۔''