Brailvi Books

 محبوب کا محبت کے دعویدار شخص کو اتنا مارنا کہ وہ غصے میں آجائے پھر غصے کی وجہ سے گالی دےاور اللہ عَزَّ وَجَلَّ کا اپنے گناہ گار بندے سے ناراض ہونا اگرچہ بندے کا گناہ کرنا اللہ عَزَّ وَجَلَّ کی تدبیر سے ہو ایسا ہی ہے جیسے گالی کھانے والا گالی دینے والے سے ناراض ہوتا ہے اگرچہ اس کے گالی دینے میں خود گالی کھانے والے کی تدبیر اور اسباب اختیار کرنے کا دخل ہواور اللہ عَزَّ وَجَلَّ کا اپنے بندوں کے ساتھ یہ فعل یعنی ان پر گناہ کے اسباب مسلط کر دینا اس پر دلالت کرتا ہےکہ  پہلے سے ہی اس کی مشیت میں بندے کو دور کرنا اور اس پر ناراض ہوناہے۔لہٰذا جو شخص اللہ عَزَّ وَجَلَّ سے محبت کرتا ہے اس پر لازم ہے کہ جس سے اللہ عَزَّ وَجَلَّ ناراض ہو اس سے یہ بھی ناراض ہو اور جس پر اللہ عَزَّ وَجَلَّ غضب فرمائے اس پر یہ بھی غصہ کرے اور جس کو اللہ عَزَّ وَجَلَّ اپنی بارگاہ سے دور کردے اس سے یہ بھی عداوت رکھے اگرچہ وہ شخص اللہ عَزَّ وَجَلَّ ہی کے غلبہ اور قدرت کی وجہ سے اس کی دشمنی اور مخالفت پر مجبور ہوا مگر پھر بھی وہ بارگاہ ِالٰہی سے دور ،مردود اور ملعون ہے اگرچہ وہ اللہ عَزَّ وَجَلَّ  کے دور کرنے سے دور ہوا ہو پھر بھی جو دَرَجاتِ قُرب سے دور کیا گیا ہے وہ اللہ عَزَّ وَجَلَّ سے محبت کرنے والے تمام لوگوں کے نزدیک مبغوض اور قابلِ نفرت ہونا چاہئے  تاکہ محبوب کے ساتھ موافقت ہوجائے کہ جس کو محبوب نے اپنی بارگاہ سے دور کر کے اس پر غصے کا اظہار کیا اس پر محب بھی غصے کا اظہار کرے۔
	اس گفتگوسے وہ تمام روایات مزید پختہ ومستحکم ہوگئیں جو اللہ عَزَّ وَجَلَّ کے فیصلے پر راضی رہتے ہوئے اس کے لئے  عداوت اور محبت کرنے ،کفار پر سختی کرنے اور ان سے انتہائی نفرت کرنے کے بارے میں وارد ہوئی ہیں اور یہ تمام روایات تقدیر کے راز سے مدد چاہتی ہیں جس کے اِفشا(ظاہر کرنے ) کی بالکل اجازت نہیں اور وہ یہ ہے کہ شر اور خیر دونوں مَشِیَّت اور ارادے میں داخل ہیں لیکن شر مکروہ اور ناپسندیدہ مراد ہے جبکہ خیر پسندیدہ مراد ہے لہذا جو کہے: ”شر اللہ عَزَّ وَجَلَّ کی طرف سے نہیں ہے ۔“وہ جاہل ہے۔ اسی طرح جو یہ کہے:” شر اور خیر دونوں اللہ عَزَّ وَجَلَّ کی طرف سے ہیں اور ان میں رضا اور کراہت کے اعتبار سے کوئی فرق نہیں ۔“وہ بھی کوتاہی کرنے والا ہے ۔
رازِ الٰہی  کو فاش نہ کرو:
	اس مسئلَۂ تقدیر کی تشریح کرنے کی اجازت نہیں اس لئے  سُکوت اور شرعی آداب کو ملحوظ رکھنا اولیٰ